MANILA, Philippines – AABOT sa 23 tricycle driver ang nahuli sa unang araw ng “No plate, no travel” policy sa Quezon City noong Lunes, Hulyo 1.
Sa ulat sinabi ng Land Transportation Office (LTO) na sa mga unang oras ng pagpapatupad ay may 16 na tsuper na binanggit para sa mga hindi rehistradong sasakyan.
Kaugnay nito lima (5) pa ang nahuli dahil sa pagpapatakbo ng motor na walang plaka habang dalawang iba pa ang nagmamaneho ng walang lisensya.
Sinabi ni LTO chief Assistant Secretary Vigor Mendoza II na ang pagpapatupad ng patakaran ay kinonsulta at napagkasunduan ng pamahalaang lungsod at ng mga pinuno at miyembro ng iba’t ibang Tricycle Operators and Drivers Association (TODA).
“Ito po ay welcome sa ating mga kaibigan sa mga TODA ng Quezon City dahil hindi lang naipaliwanag natin ng maayos ang kahalagahan ng polisiyang ito kundi sila mismo ay nagrereklamo sa mga kolorum na mga tricycle na inaagawan ang mga ito na dapat ay para sa kanila (TODAs Sa Quezon City, malugod na tinatanggap ang bagong patakaran dahil nagrereklamo sila tungkol sa mga colorum na tricycle, na nakakaapekto sa kita ng mga lehitimong driver at operator,” ani Mendoza.
Kaugnay nito batay sa patakaran, “lahat ng tricycle ay dapat magpakita ng valid at awtorisadong lisensyadong mga plaka sa lahat ng oras habang bumibiyahe sa kalsada.”
Ang mga plaka ng lisensya ay dapat na malinaw na nakikita at maayos na nakakabit sa mga tricycle.
Sinabi ni Mendoza na sapat na bilang ng mga tauhan ng LTO at mga traffic enforcer ng lungsod ang ipapakalat sa mga estratehikong lugar upang ipatupad ang patakaran.
“Anumang tricycle na makikitang tumatakbo nang walang valid na plaka ay huhulihin, habang ang naaangkop na legal na aksyon at mga parusa alinsunod sa mga umiiral na batas at regulasyon ay dapat ipataw,” ang binasa ng LTO memorandum. (Santi Celario)
