Home NATIONWIDE 25K public schools walang principal – EDCOM

25K public schools walang principal – EDCOM

MANILA, Philippines – Mahigit kalahati ng mga pampublikong paaralan sa bansa ang nag-ooperate nang walang principal sa kabila ng polisiya na nagbibigay mandato sa principal plantilla items sa bawat paaralan.

Sa report ng Second Congressional Commission on Education (Edcom 2) Year 2 na inilabas nitong Lunes, Enero 27, nakita na halos 25,000 paaralan sa ilalim ng Department of Education (DepEd) ang walang fully designated principals.

Ayon sa Edcom, nasa kabuuang 24,916 paaralan ang walang principal, at 13,332 sa mga ito ang pinamumunuan lamang ng head teacher; 8,916 paaralan ang pinamumunuan ng teacher in charge (TIC); 2,337 ng officer in charge (OIC); at 193 ang “undefined.”

Nangangahulugan ito na tanging 20,381 lamang sa 45,199 paaralan ang may principal, bagamat hindi lahat sa mga ito ang may corresponding plantilla item.

Sa 20,381 paaralan na may principal, tanging 18,744 lamang ang may plantilla items, ngunit 1,381 sa mga ito ang pinangungunahan ng head teachers, TIC o OIC, “underscoring challenges in adhering to policy guidelines.”

Tinukoy din ng Edcom ang “widespread inconsistencies” sa alokasyon ng school heads lalo’t nasa 12,057 paaralan ang may “incorrect school head items.”

“The issue was especially prevalent among elementary schools, with 8,533 pure elementary schools and 639 schools offering both elementary and junior high levels failing to comply with DepEd policies,” saad pa sa report. RNT/JGC