MANILA, Philippines – Umabot sa 28 Chinese warships at coast guard vessels ang namonitor sa apat na mahahalagang bahagi ng West Philippine Sea mula Abril 5 hanggang 12, ayon sa isang mataas na opisyal ng Philippine Navy nitong Martes.
Sa press briefing sa Camp Aguinaldo sa Quezon City, sinabi ni Philippine Navy spokesperson for the West Philippine Sea Rear Admiral Roy Vincent Trinidad na namataan ang mga naturang sasakyang-pandagat sa Bajo de Masinloc, Ayungin Shoal, Escoda Shoal, at Pag-asa Island.
Ayon kay Rear Admiral Roy Vincent Trinidad, 10 China Coast Guard vessels ang namonitor sa Bajo de Masinloc. Sa Ayungin Shoal naman ay namataan ang tatlong warship ng People’s Liberation Army Navy at anim na barko ng China Coast Guard. Sa Escoda Shoal, isang PLAN vessel at tatlong CCG ships ang namonitor, habang isang Chinese warship at apat na Chinese coast guard vessels ang nakita malapit sa Pag-asa Island.
Ikinumpara rin ng Philippine Navy ang datos sa monitoring noong Marso, kung saan aabot sa 90 Chinese warships at coast guard vessels ang naitala sa parehong apat na bahagi ng West Philippine Sea.
“Specific to the WPS, we have documented the persistent and unauthorized presence of the PLAN and CCG. For this month, a total of 90 different vessels were monitored across (four) key features,” nauna nang sinabi ni Trinidad.
Sinabi niya na sa breakdown noong Marso, 49 vessels ang naitala sa Bajo de Masinloc, 15 sa Pag-asa, 14 sa Ayungin Shoal, at 12 sa Escoda Shoal. Santi Celario
