MANILA, Philippines- Nasa 28 military personnel na nakatalaga sa BRP Sierra Madre sa Ayungin Shoal (Second Thomas Shoal) ang nakauwi na nitong Lunes, kasunod ng matagumpay na Rotation and Resupply (RoRe) mission nitong weekend.
Personal na sinalubong ni Armed Forces of the Philippines (AFP) chief-of-staff Gen. Romeo Brawner Jr. at pinarangalan ang mga umuwing sundalo sa Naval Detachment Oyster Bay Pier sa Puerto Princesa, Palawan.
“The AFP extends its heartfelt gratitude to these valiant men and women for their unwavering service and sacrifices. Their dedication ensures the integrity of our territory, sovereignty, and sovereign rights, reflecting the true spirit of patriotism,” pahayag ni Brawner.
Pinasalamatan din ni Brawner ang mga pamilya ng mga umuwing tauhan sa kanilang pasenya, suporta, at pag-unawa sa kanilang deployment.
“The strength and resilience of these families are crucial to the morale and effectiveness of our troops,” giit ng opisyal.
Natapos ang deployment ng servicemen sa naval garrison ng bansa kasunod ng pagsasagawa ng RoRe noong Hulyo 27, sa unang pagkakataon matapos magkasundo ang Pilipinas at China sa isang “provisional arrangement.”
Nakasentro sa BRP Sierra Madre ang engkwentro sa pagitan ng Chinese at Philippine ships sa mga nakalipas na buwan sa mas maigting na paggiit ng Beijing sa pag-angkin nito sa halos kabuuan ng South China Sea. RNT/SA
