Bulacan – Arestado ang isang binata na umanoy nambugbog ng 3 taong gulang na lalaking ampon sa lungsod San Jose Del Monte (SJDM).
Kinilala ng pulisya ang suspek sa alyas na “Tak Tak”, 27, habang ang biktima ay itago sa pangalang “Utoy” kapwa residente ng Towerville, Brgy. Gaya-Gaya.
Sa report ng SJDM police, naganap ang insidente bandang 6:00 ng umaga nitong Agosto 11 sa naturang lugar.
Ayon sa imbestigasyon, natutulog ang suspek nang bigla itong gisingin ng kaanak kaya naalimpungatan at na-bad trip.
Nang makita ang kanilang ampon na masayang naglalaro sa bangkito ay kanyang pinagbalingan hanggang pagsasapakin at pagsasampalin.
Isang concerned citizen ang nakakita sa pangyayari na agad nagsumbong sa kanilang barangay kaya nahuli ang suspek at isinuko kalaunan sa pulisya.
Nahaharap ang suspek sa kasong paglabag sa RA 7610 (Physical Abuse) habang nakakulong sa naturang himpilan ng pulisya.(Dick Mirasol III)
