MANILA, Philippines – Inirekomenda ng National Bureau of Investigation (NBI) ang pagsasampa ng tatlong bilang ng grave threat at isang bilang ng inciting to sedition laban kay Vice President Sara Duterte.
Batay sa affidavit of investigation, hindi tinanggap ng NBI ang paliwanag ni Duterte na “conditional” lamang ang kanyang banta na papatayin ang Pangulo, First Lady, at dating House Speaker kung siya ay mapapatay.
Ayon sa NBI, malinaw at matindi ang naging pahayag ng Bise Presidente at may layuning magbigay ng banta. “Considering the context when these statements were expressed, there is a clear intention on the part of Vice President Duterte to intimidate and convey a serious threat to the recipients of her statements,” ayon sa affidavit.
Kasama rin sa rekomendasyon ang kasong inciting to sedition kaugnay ng kanyang mga pahayag noong November 2024 online press conference at October 2024 briefing, kung saan sinabi niyang minsan niyang naisip “decapitating the President.”
Ayon pa sa NBI, “As the Vice President of the Philippines, she could easily arouse a sense of dissatisfaction against the duly constituted authorities…” at ang kanyang mga pahayag ay maaaring “tend to incite and stir up the hearers to overthrow the organized government by unlawful means.”
Dagdag pa nila, ang mga pahayag ay maaaring magdulot ng kaguluhan sa kaayusan at seguridad ng pamahalaan.
Sinabi ng mga miyembro ng House Committee on Justice na ang affidavit ay magiging mahalagang ebidensya sa impeachment proceedings laban kay Duterte.
Hanggang sa ngayon, wala pang pahayag ang Office of the Vice President kaugnay ng isyu. RNT/MND
