LEGAZPI CITY, Albay- Patay ang tatlong construction workers habang dalawa pa ang sugatan matapos makuryente habang nagkakabit ng steel solar streetlight post sa Barangay Bagumbayan Sur, Naga City, Camarines Sur nitong Biyernes.
Kinilala ni Police Lt. Col. Malu Calubaquib, tagapagsalita ng Police Regional Office-5 (Bicol), ang mga biktima na sina Amador, 27, at JR, 30, mula sa Camarines Norte at Juan, 40, mula sa Camarines Sur.
Batay sa imbestigasyon, nagkakabit ang mga biktima ng steel solar streetlight post nang aksidenteng mahawakan ang live wire ng Camarines Sur Electric Cooperative at makuryente.
Sugatan ang dalawang katrabaho na sina Anton, 24, mula sa Camarines Norte at Jose, 36, mula sa Camarines Sur.
Dinala ang mga biktima sa Bicol Medical Center kung saan idineklarang dead on arrival ang tatlo.
Sinabi ni Calubaquib na nasa kritikal na kondisyon ang mga sugatan.
Patuloy ang imbestigasyon sa insidenteng ito. RNT/SA
