MANILA, Philippines – Tatlo ang naiulat na nasawi sa Bicol Region dahil sa pagbayo ng Tropical Storm Kristine (international name: Trami), ayon sa Police Regional Office 5 (PRO5) nitong Miyerkules.
Sinabi rin ni Police Brigadier General Andre Perez Dizon, Bicol region police chief, sa mga mamamahayag na isang tao ang nawawala at anim na iba pa ang nasugatan bandang 6 a.m.
Sa isang situation briefing kay Pangulong Ferdinand “Bongbong” Marcos Jr. nitong Miyerkules ng umaga, iniulat ng Office of Civil Defense (OCD) na isang tao ang naiulat na namatay sa Palanas, Masbate matapos matamaan ng natumbang sanga ng puno.
Sa datos ng OCD, pito ang naiulat na nawawala, kabilang ang tatlo sa San Fernando, Masbate na nangisda; tatlo sa Daanbantayan, Cebu; at isa sa Pilar, Cebu.
Limang tao ang nasugatan kabilang ang apat sa Northern Samar, at isa sa Labo, Camarines Norte na naaksidente sa sasakyan, sabi ng OCD.
Samantala, ang National Disaster Risk Reduction and Management Council (NDRRMC) ay nag-ulat ng mas kaunting bilang kung saan tatlong tao lamang ang nawawala sa Bicol.
Sa ulat nito alas-8 ng umaga, sinabi rin ng NDRRMC na isang tao ang naiulat na nasugatan sa rehiyon.
May kabuuang 382,302 indibidwal o 77,910 pamilya ang naapektuhan ng Kristine sa Bicol, Western Visayas, Eastern Visayas, at Zamboanga Peninsula, sinabi ng NDRRMC.
Sa mga apektadong populasyon, 12,334 katao o 3,095 pamilya ang nananatili sa mga evacuation center habang 364 katao o 96 na pamilya ang nakasilong sa ibang lugar.
Sinabi ng NDRRMC na ang mga baha, pagguho ng lupa, isang aksidente sa sasakyan, at isang nabunot na puno ay iniulat sa mga apektadong rehiyon. RNT
