3 Pinoy nasagip sa pananakit ng ilang Chinese sa scam hub sa Cambodia

MANILA, Philippines – Naiuwi ng ligtas ng mga ahente ng National Bureau of Investigation (NBI) ang tatlong Filipino nationals na nagpasaklolo sa ahensya dahil sa pambubugbog sa kanila ng ilang Chinese sa isang scam hub sa Cambodia.

Ayon kay NBI Director Jaime Santiago, inalok na maging call center agent ang dalawang 25-anyos na babae at isang 26-anyos na lalaki
subalit ginawa silang mga scammer.

Kagyat itong tinugunan ni Dir. Santiago at ipinag-utos na iulat ang usapin sa OIC-Executive Director ng DOJ-IACAT para sa naaangkop na aksyon.

Sa pahayag ng mga biktima sa NBI, nagtungo sila sa Phnom Penh, Cambodia mula Dipolog City noong Enero 7, 2025.

Dumaan sila ng Basilan, Tawi-Tawi, Sabah, Malaysia gamit ang ferry bago lumipat sa isang maliit na bangka patungo naman ng Cambodia kung saan sila nakarating noong Enero 17.

Dinala sila sa isang compound na may ilang gusali at hindi pinapayagang lumabas ng kanilang Chinese boss.

Ayon sa NBI, hinikayat silang magtrabaho bilang Customer Service Representatives ng isang Filipino HR ng isang casino company sa Cambodia at inalok ng sahod na 1000USD.

Sa halip na Customer Service Representatives ang kanilang trabaho, ay inatasan silang i-scam ang mga matatandang banyaga sa pamamagitan ng cryptocurrency sa social media apps tulad ng Signal, Twitter at Instagram.

Bukod pa rito, ang ipinangakong sahod na 1000USD ay naging 300USD na lamang ang kanilang natanggap.

Nang gusto nang umalis sa scam hub, dito na umano sila nakaranas ng pananakit tulad ng paninipa, paglatigo, at pamamaso ng sigarilyo.

Matapos makakalap ng mga konkretong impormasyon at sa pamamagitan ng tamang koordinasyon sa ilang ahensya ng gobyerno, agad kumilos ang NBI at nailigtas ang mga biktima pabalik ng Pilipinas.

Nagpasalamat naman si Santiago sa Cambodian counterparts na tumulong sa mga biktima.

Ipinunto ni Santiago ang tagumpay ay patunay ng matibay at walang humpay na pagtutulongan sa pagitan ng dalawang nasyon laban sa transnational crimes. Jocelyn Tabangcura-Domenden