3 residente inaresto sa demolisyon sa Tondo

Tondo, Maynila — Tatlong residente ang inaresto sa nagpapatuloy na demolisyon sa Barangay 262 at 264 sa Mayhaligue Street, Tondo, Maynila.

Bahagyang nagkaroon ng tensyon sa pagitan ng demolition team at mga residenteng patuloy na tumututol at ayaw lisanin ang kanilang mga tahanan.

Ayon kay Sheriff Raymundo Rojas ng Metropolitan Trial Court, isinasaalang-alang nila ang humanitarian consideration bunsod ng masamang panahon, lalo na’t mahirap makahanap ng malilipatan ang mga maaapektuhang residente.

Ipinaliwanag ni Rojas na sa ilalim ng batas, dapat itigil ang demolisyon kapag umuulan, kaya pansamantalang sinuspinde ang operasyon.

Gayunman, nanindigan ang demolition team na ipatutupad pa rin ang kautusan ng korte sa mga susunod na araw.

Mahigpit namang binabantayan ng mga residente ang mga lagusan sa lugar upang harangin ang mga demolition team at mga pulis na nakaantabay sa paligid ng dalawang barangay.

Ayon pa kay Rojas, tanging Temporary Restraining Order (TRO) mula sa korte ang makapipigil sa pagpapatuloy ng demolisyon na ilang taon nang naantala.

Samantala, iginiit ng mga residente na handa silang lumikas kung maipapakita lamang ang opisyal na kautusan ng korte, ngunit umaapela rin silang mabigyan ng disenteng malilipatan bago sila tuluyang umalis. — Jocelyn Tabangcura-Domenden