MANILA, Philippines – INIULAT ng Bureau of Immigration (BI) ang pagkakaaresto sa tatlong Chinese national na residente sa Ligao City, Albay noong Enero 24 dahil sa paglabag sa mga limitasyon at kondisyon ng kani-kanilang visa.
Ibinahagi ni BI Intelligence Division Chief Fortunato Manahan, Jr. na ang kaso ay nagmula sa impormasyong natanggap mula sa Legazpi District Office ng BI laban sa mga Chinese na sina Li Xiaodong, Shi Jiazhu, at Shi Yushuang.
Batay sa isinagawang beripikasyon, nadiskubre na ang mga nasabing dayuhan, na unang sumasailalim sa biometrics para sa mga kadahilanang pangkalusugan sa Legazpi, ay aktwal na nagtatrabaho sa iba’t ibang kumpanya sa Metro Manila, isang malinaw na paglabag sa kanilang mga limitasyon sa visa.
Ang tatlo ay natagpuan ng mga intelligence agent na nagtatrabaho sa isang hardware at merchandise company sa kabila ng kanilang mga visa.
“Our intelligence efforts, combined with effective operations, ensure that visa violators are identified and apprehended promptly. This operation underscores the importance of strict adherence to visa conditions,” ani Manahan.
Pinuri ni BI Commissioner Norman Tansingco ang operasyon, na binibigyang-diin ang pangako ng BI na itaguyod ang mga batas sa imigrasyon.
“The BI remains steadfast in its commitment to enforcing immigration laws and ensuring that individuals comply with visa conditions. This operation is a testament to the effectiveness of our collaborative efforts,” ani Tansingco.
Ang mga nasabing dayuhan ay dinala sa BI Main Office sa Intramuros para sa tamang booking procedures, medical examinations, at legal disposition. Ilalagay sila sa pasilidad ng BI sa loob ng Camp Bagong Diwa, Taguig habang hinihintay ang resolusyon ng kanilang deportation case. JAY Reyes
