MANILA, Philippines – May kabuuang 309,518 katao o 85,415 pamilya sa ilang rehiyon ng Luzon ang naapektuhan ng tropical cyclone na Nika at Ofel, sinabi ng National Disaster Risk Reduction and Management Council (NDRRMC) nitong Huwebes.
Sa ulat nitong alas-8 ng umaga, sinabi ng NDRRMC na ang mga apektadong indibidwal ay naiulat sa Ilocos Region, Cagayan Valley, Central Luzon, Bicol, at Cordillera Administrative Region.
Sa kabuuang apektadong populasyon, 26,923 katao o 8,676 pamilya ang nananatili sa mga evacuation center habang 19,572 katao o 5,653 pamilya ang nakasilong sa ibang lugar.
Hindi bababa sa dalawang tao ang naiulat na nasugatan sa Central Luzon sa gitna ng pananalasa nina Nika at Ofel, ayon sa NDRRMC.
Napinsala sa imprastraktura na nagkakahalaga ng P320,658,974 ang naiulat sa Central Luzon.
May kabuuang 2,394 na bahay din ang nasira—2,158 partially at 236 totally. Karamihan sa mga ito ay naiulat sa Cagayan Valley na may 1,921 nasirang bahay.
May kabuuang 153 na seksyon ng kalsada at 91 na tulay ang naapektuhan sa pagbaha sa ilang lugar. Dalawampu’t isang daungan ang sinuspinde ang kanilang operasyon dahil sa banta nina Nika at Ofel.
Nasa P10,646,973 ang naibigay na tulong sa mga biktima sa ngayon, ayon sa NDRRMC.
Nag-landfall si Nika noong Nobyembre 11 sa paligid ng Dilasag, Aurora at binagtas ang Northern Luzon. Lumabas ito sa Philippine area of responsibility (PAR) noong Nobyembre 12.
Samantala, lumakas si Ofel na naging isang super typhoon noong Huwebes. Santi Celario
