31 civilian informants, binahagian ng P7.4M reward

MANILA, Philippines – Naglaan ang Philippine Drug Enforcement Agency (PDEA) ng mahigit ₱7.4 milyon bilang pabuya sa 31 civilian informants na tumulong sa serye ng matagumpay na operasyon laban sa ilegal na droga sa ilalim ng Operation: Private Eye (OPE).

Iginawad ang kabuuang ₱7,466,707.69 sa PDEA National Office sa Quezon City, kung saan anim na impormante ang personal na tumanggap ng gantimpala habang ang iba ay ginawaran sa kani-kanilang rehiyon. Nanatiling kumpidensyal ang kanilang pagkakakilanlan para sa seguridad.

Ayon kay PDEA Director General Undersecretary Isagani Nerez, mahalaga ang papel ng mga sibilyan sa paglaban sa ilegal na droga.

“These individuals exemplify the power of citizen action,” aniya. “Their information led to 33 high-impact anti-drug operations that dismantled criminal networks, resulted in the seizure of significant quantities of illegal drugs, and apprehension of high-value drug personalities.”

Pinakamalaki ang natanggap na gantimpala na umabot sa ₱1.83 milyon, matapos magbigay ng impormasyon na nagresulta sa pagkakasamsam ng halos 25 kilo ng shabu at pagkakaaresto ng tatlong drug personalities sa Quezon.

Tiniyak ng PDEA na dumaan sa masusing pagsusuri ng OPE Reward Committee ang pamamahagi ng pabuya upang matiyak ang transparency at integridad ng programa.

Binigyang-diin din ni Nerez ang mahalagang papel ng publiko sa mga operasyon laban sa droga.

“Ang kanilang pagbabantay at pagpayag na lumabas sa bukas at magsalita sa kabila ng mga panganib na kasangkot, ay nakagambala sa mga aktibidad ng ilegal na droga at tumulong na protektahan ang hindi mabilang na buhay,” aniya.

Hinikayat din niya ang publiko na makiisa sa laban kontra droga.

“We call on every Filipino to be part of the solution. Do not underestimate the power of your voice. A single piece of information can save lives, dismantle illegal drug networks, and restore peace in your community,” dagdag niya. Santi Celario