MANILA, Philippines – Umabot sa 48 barkong Tsino, kabilang ang mga warship, ang namataan sa ilang bahagi ng West Philippine Sea (WPS) sa nakalipas na isang linggo, ayon sa Philippine Navy nitong Martes.
Mas mababa ito kumpara sa naunang ulat na 55 barko, ngunit hindi ibinigay sa kasalukuyang ulat ang bilang ng Chinese maritime militia vessels.
Batay sa datos, tumaas ang bilang ng mga barkong Tsino sa Bajo de Masinloc mula 13 ay naging 21, sa Ayungin Shoal mula lima ay naging 12, at sa Escoda Shoal mula pito ay naging walo.
Ayon kay Philippine Navy spokesperson for WPS Rear Admiral Roy Vincent Trinidad, hanggang Pebrero 2 ay mino-monitor ang mga sumusunod na barkong Tsino sa WPS:
— Bajo de Masinloc — 21 (10 People’s Liberation Army Navy, 11 China Coast Guard)
— Ayungin Shoal — 12 (12 China Coast Guard)
— Escoda Shoal — walo (tatlong China Coast Guard, limang China Coast Guard)
— Pagasa Island — pito (dalawang People’s Liberation Army Navy, limang China Coast Guard)
Patuloy ang tensyon sa South China Sea dahil inaangkin ng China ang halos buong lugar, na mahalagang ruta ng kalakalan na tinatayang lampas $3 trilyon kada taon.
Inaangkin din ang ilang bahagi nito ng Pilipinas, Vietnam, Indonesia, Malaysia, at Brunei.
Ang mga bahagi ng South China Sea na saklaw ng teritoryo ng Pilipinas ay tinawag ng pamahalaan na West Philippine Sea upang patibayin ang pag-aangkin ng bansa.
Saklaw nito ang mga karagatang nasa kanlurang bahagi ng kapuluan ng Pilipinas, kabilang ang Luzon Sea, Kalayaan Island Group, at Bajo de Masinloc.
Noong 2016, pumanig sa Pilipinas ang Permanent Court of Arbitration sa The Hague at nagsabing walang legal na batayan ang mga pag-aangkin ng China sa South China Sea.
Gayunman, tumanggi ang China na kilalanin ang naturang desisyon. RNT/MND
