MANILA, Philippines – Inaresto ang isang lasing na pulis matapos umano niyang barilin at saktan ang kanyang asawa sa Barangay Ayungon, Valladolid, Negros Occidental noong Martes.
Ayon kay Police Capt. Bonifacio Galvez Jr., deputy chief ng Valladolid Municipal Police Station, nasa bakasyon ang 33-anyos na suspek mula sa Malay Municipal Police Station sa Aklan matapos manganak ang kanyang asawa sa kanilang ikatlong anak.
Matapos makipag-inuman sa kanyang biyenan, pumasok ang suspek sa kanilang silid bago maghatinggabi, kinuha ang kanyang 9mm Glock 17 service firearm, at binaril ang asawa na tinamaan sa kanang itaas na braso.
Humingi ng tulong ang biktima, isang guro sa elementarya, sa mga kamag-anak na agad nag-ulat sa pulisya. Naaresto ang suspek sa kanilang bahay at narekober ang baril at isang basyo ng bala.
Kasalukuyang nagpapagaling sa ospital ang biktima.
Wala umanong naitalang alitan ang mag-asawa bago ang insidente at nagsisisi ang suspek sa kanyang nagawa. Nahaharap siya sa kasong frustrated parricide at paglabag sa Republic Act 9262 o Anti-Violence Against Women and Their Children Act of 2004. RNT
