MANILA, Philippines – Iisyuhan ng Department of Energy (DOE) ng show-cause order ang nasa 54 gasolinahan sa buong bansa sa umano’y pananamantala sa malakihang oil price hike ngayong linggo dahil sa tensyon sa Middle East.
Nakatanggap kasi ng report ang DOE ng hoarding at profiteering, karamihan ay mula sa Luzon at may ilan din sa Visayas at Mindanao.
“If gasoline stations refuse to sell because some of them are waiting for the prices to go up, that’s not allowed,” sinabi ni Energy Secretary Sharon Garin sa panayam ng ANC.
Ani Garin, may sapat na suplay ang bansa ng oil products sa loob ng walong linggo.
“We don’t allow hoarding, we don’t allow unreasonable increases in prices, that’s a violation of the directive of the Department of Energy,” aniya.
Sinabi ni Energy Undersecretary Wimpy Fuentebella na nag-inspeksyon ang ahensya sa mga gasolinahan sa Pasig City at Fairview, Quezon City.
Pinagpapaliwanag ang mga ito sa umano’y pagpapatupad ng fuel price increase bago pa man ang itinakdang adjustment schedule tuwing Martes.
Ani Fuentebella, mahaharap sa reklamong administratibo o kriminal ang mga may-ari ng gasolinahan at posible pang makansela ang permit ng mga ito. RNT/JGC
