6-anyos patay matapos magulungan ng SUV sa Baseco

MANILA, Philippines – Patay ang isang 6-anyos na batang babae matapos magulungan ng SUV habang naglalaro sa gilid ng kalsada sa Barangay 649, Baseco, Maynila.

Batay sa CCTV footage noong Oktubre 30, makikitang naglalaro ang bata sa gilid ng kalsada nang lumiko ang isang itim na SUV at mahagip siya.

Dire-diretso umanong umalis ang sasakyan matapos ang insidente.

Ayon sa ina ng biktima na si Sfica Ulama, saglit lamang siyang umalis upang bumili ng pagkain para sa kaniyang anak.

Hindi na niya naabutan ang bata na naisugod pa sa ospital ngunit kalaunan ay binawian din ng buhay.

Iginiit ng ina na dapat huminto ang driver matapos masagasaan ang kaniyang anak at nanawagan ng hustisya para rito.

“Kaisa-isang anak po namin,” ani Ulama, na nagsabing pangarap umano ng bata na maging guro o pulis paglaki.

Naaresto naman ang driver matapos habulin ng isang concerned citizen na sakay ng motorsiklo ang SUV hanggang Second Street sa parehong barangay.

Ayon kay Police Major Joel Aquino, hepe ng VTIS-Manila District Traffic Enforcement Unit, naabutan ang sasakyan sa lugar kung saan mayroon ding naka-duty na pulis kaya agad na naaresto ang driver.

Negatibo umano sa alcohol intoxication ang driver.

Depensa naman ng suspek, hindi niya nakita ang bata at wala rin umano siyang naramdamang anumang sagabal habang nagmamaneho kaya hindi siya huminto.

Itinanggi rin niyang sinadya niyang takasan ang insidente at sinabing handa ang kaniyang pamilya na makipag-usap sa pamilya ng biktima.

Nananatili sa kustodiya ng MDTEU ang driver at nahaharap sa reklamong reckless imprudence resulting in homicide. RNT