MANILA, Philippines – INIULAT ng Bureau of Immigration (BI) na nasagip ng kanilang mga tauhan ang anim na biktima ng human trafficking makaraang maharang ang mga ito sa Palawan.
Ayon kay BI Commissioner Joel Anthony Viado, iniligtas ng inter-agency action ang mga nasabing biktima matapos makatanggap ang national operations center ng BI ng impormasyon ng pagtatangka ng mga ito na lumabas ng bansa sa pamamagitan ng ilegal na paraan.
Aniya, ang mga opisyal ng immigration protection at border enforcement section (I-PROBES) ay agad na nag-coordinate ng impormasyon sa inter-agency council against trafficking (IACAT), pagkatapos ay naghatid ng impormasyon sa mga operatiba.
Nailigtas ang 6 na biktima matapos tangkaing iligal na umalis ng bansa sa pamamagitan ng Bancalaan Island sa Balabac, Palawan sakay ng maliit na bangka.
Namonitor ng mga operatiba ng Ninoy Aquino International Airport Task Force on Anti Trafficking (NAIA-FAT) ang kanilang pag-alis mula NAIA patungong Puerto Princesa sa Palawan.
Ang mga biktima ay iniulat na bumiyahe mula Puerto Princesa patungong Buliluyan, Bataraza pagkatapos ay bumiyahe sakay ng bangka patungo sa Bancalaan Island kung saan sila pinahinto sa pakikipag-ugnayan sa Balabac Municipal Police at Barangay Officials.
Ibinunyag ng mga biktima na na-recruit sila sa pamamagitan ng Telegram at nag-alok ng trabaho sa Thailand.
Ang mga biktima ay dinala pabalik sa Puerto Princesa City para sa karagdagang imbestigasyon ng NBI.
Hinihimok naman ng pamunuan ng BI ang publiko na iulat ang mga pagtatangka sa trafficking sa 1343 Actionline ng IACAT. JR Reyes
