600 katao nabiyayaan ng tulong pinansiyal ni Sen. Tol sa Tondo

UMABOT sa 600-katao ang nakatanggap ng tulong pinansiyal mula sa pondo ni Senator Francis “Tol” Tolentino sa ilalim ng Assistance to Individuals in Crisis Situations (AICS) Martes ng umaga sa Barangay 123 Moriones sa Tondo, Manila.

Layon ng programang AICS ng Department of Social Welfare and Development (DSWD) na matugunan ang pangangailangan ng mga pamilya at indibiduwal mula sa hindi inaasahang pangyayari, tulad ng nagdaang hagupit ng bagyong Carina.

Nabatid na tig-P2,000 tulong pinansiyal ang ipinamahagi sa mga nasabing bilang ng mga benepisyaryo kung saan bukod pa ang anim na persons with disability (PWD) ang tumanggap ng wheel chair mula kay Sen. Tolentino, habang dalawa naman ang nanalo ng bisikleta at may ilan pang nakatanggap ng ipina-raffle na mga rice cooker at iba pang gamit pang-kusina.

Pinasalamatan naman ng mga residente at opisyal ng Barangay 123 si Sen. Tolentino sa walang sawang pagkakaloob nito sa kanila ng tulong, mula pa noong panahon ng pandemyang dulot ng COVID-19.

Sa mensahe naman ni Sen. Tolentino, isa sa nakikita niyang solusyon sa maraming problema ng Pilipinas ay ang pagtutulungan ng bawa’t isa.

“Ituring natin, i-trato natin ang ating kapitbahay, ang ating mga ka-barangay na ating kapatid, parang utol. Kung gagawin po natin yan, maraming problema sa inyong barangay, sa Maynila at maging ng buong bansa ang mababawasan dahil marami po ay nagmumula sa hindi pagkakaunawaan,” ani Sen. Tolentino.

“Sana po, sa tulong ng DSWD, itong kaunting matatanggap ninyo ay makatulong ng bahagya sa inyong pangangailangan,” dagdag pa ng Senador. JAY Reyes