MANILA, Philippines – Pinalawak ng Philippine Health Insurance Corporation (PhilHealth) ang Yaman ng Kalusugan Program (YAKAP) upang isama ang screening tests para sa apat na pangunahing uri ng cancer at madagdagan ang libreng gamot sa kabuuang 75, ayon sa opisyal ng ahensiya noong Miyerkules.
Sinabi ni PhilHealth spokesperson Israel Francis Pargas na nadagdagan ng 54 na libreng gamot sa ilalim ng Guaranteed and Accessible Medications for Outpatient Treatment (GAMOT) program, kaya umabot na sa 75 ang kabuuang libreng gamot na maaaring makuha.
“We also have expanded the YAKAP program to include screening test po para doon sa four top cancers in the Philippines: Iyon pong breast cancer, so mayroon tayong libreng chest mammography at saka po chest, breast ultrasound,” ani Pargas sa programang “Bagong Pilipinas Ngayon.”
Dagdag niya, mayroon ding libreng screening para sa liver, lung, at colorectal cancers.
“Para naman po sa liver cancer, we have libreng Alpha-fetoprotein at para po sa lung cancer, mayroon tayong tinatawag na low-dose CT scan; and para po sa colorectal cancer, iyon pong libreng colonoscopy screening examination,” aniya.
Bago ang pagpapalawak, nag-aalok na ang YAKAP ng libreng konsultasyon, 13 laboratory procedures, at 21 libreng gamot.
Maaaring makuha ng mga miyembro ng PhilHealth ang mga libreng gamot sa mga YAKAP-accredited clinics kung saan sila nakarehistro. Santi Celario
