MANILA, Philippines – Sinabi ng Department of Budget and Management (DBM) na 76 child development centers ang itatayo sa Bangsamoro Autonomous Region in Muslim Mindanao (BARMM) bilang bahagi ng ‘nationwide push’ para gawing mahusay at maayos ang early childhood care.
Sinabi ni Budget Secretary Amenah Pangandaman, sa isinagawang post-State of the Nation Address (SONA) briefing, na ang Education Commission 2 (EDCOM II), na inatasan na pag-aralan ang reporma sa sektor ng edukasyon, napuna ang kakapusan sa child development centers sa bansa.
At para matugunan ito, inaprubahan ni Pangulong Ferdinand R. Marcos Jr. ang pagtatayo ng mahigit sa 300 child development centers sa buong bansa: 89 sa Luzon, 106 sa Visayas, at 133 sa Mindanao, kung saan, 76 ay nasa Bangsamoro Region.
“Each child development center has been allocated P3 million for infrastructure costs,” ayon kay Pangandaman, nagsilbi rin bilang co-chairperson ng Intergovernmental Relations Body (IGRB) para sa national government.
Ang IGRB ay nagsilbi naman bilang isang joint mechanism para sa nasyonal at sa BARMM governments para itulak ang ‘peace and development initiatives’ sa Bangsamoro.
Ani Pangandaman, ang joint memorandum kasama ang Department of Education (DepEd) at Early Childhood Care and Development (ECCD) Council ay nilagdaan na para sa programa.
“Mamayang hapon po pipirmahan na natin together with the local government units, the beneficiaries para masimulan na nila yung proyekto,” ang tinuran pa rin ng Kalihim. /Kris Jose
