GENERAL SANTOS, Philippines – Narekober ng Coast Guard District Southern Mindanao o CGDSM ang bangkay ng isa sa dalawang nawawalang indibidwal na naligo sa Barangay Bawing, General Santos nitong Miyerkules, June 10.
Iniulat ng mga lokal na mangingisda sa CGDSM na may nakita silang lumulutang na bangkay malapit sa Gensan Fishport, Barangay Tambler, General Santos City.
Bilang tugon, agad na ipinadala ang team sakay ng Rigid Hull Inflatable Boat o RHIB 101-435 at rubber boat Number 023 para i-verify ang ulat.
Bandang 8:04 ng umaga, natagpuan at nakuha ng team ang bangkay sa naiulat na lokasyon, humigit-kumulang limang nautical miles mula sa dalampasigan ng Barangay Tambler.
Dinala ang mga labi sa dalampasigan at kinilala ito ng mga kaanak na kamag-anak nila ang 8 taong gulang na lalaking biktima.
Matapos ang tamang pagkakilanlan, maayos na ibinalik ang mga labi sa pamilya para sa kaukulang paglilibing.
Naaayon ito sa iCARE o Intensified Community Assistance, Awareness, Response, and Enforcement Program ng PCG.
Nananatiling nakatuon ang PCG sa pagsuporta sa mga search and rescue operations para sa lahat ng sangkot sa insidente. Jocelyn Tabangcura-Domenden
