MANILA, Philippines- Inihirit ng Land Transportation Office (LTO) sa siklista na sangkot sa Marikina road rage incident sa SUV na maghain ng notarized written complaint at iba pang supporting documents bilang parte ng imbestigasyon.
Pinagsusumite rin ang driver at may-ari ng puting Nissan Patrol na may plakang NFY 4437 ng notarized affidavits kung saan nakasaad “why they should not be held liable for violations of the provisions of the Republic Act 4136, or the Land Transportation and Traffic Code.”
Nitong Huwebes, naglabas ang LTO ng show cause order (SCO) laban sa dalawa. Kapwa sila nahaharap sa reckless driving, obstruction of traffic, improper person to operate a motor vehicle sa ilalim ng Republic Act 4136, at disregarding traffic signs sa ilalim ng Joint Administrative Order No. 2014-01.
“Agad na pag-aksyon ang ginawa ng LTO dahil gusto nating maresolba kaagad ang kaso lalo na ang mga insidenteng may kinalaman sa road safety. Under my leadership, the LTO will not tolerate any forms of altercation and road rage incidents,” pahayag ni LTO chief Assistant Secretary Atty. Vigor Mendoza II.
Ibinigay ang mga kopya ng SCOs at imbitasyon sa bicycle rider sa opisina ni Department of Transportation Secretary Jaime Bautista, ayon sa LTO.
Naganap ang road rage incident noong May 16 nang atakihin ng SUV driverang isang bicycle rider sa pedestrian lane, na nagdulot ng mabigat na daloy ng trapiko. RNT/SA
