MANILA, Philippines- Nagpalabas ang Department of Budget and Management (DBM) ng P900 milyon para sa crop insurance premiums ng mga magsasaka at mangingisda sa bansa.
Bunsod ito ng nagpapatuloy na El Niño phenomenon na nararanasan ngayon sa Pilipinas.
Inanunsyo ni Budget Secretary Mina F. Pangandaman na ipinalabas ang pondo sa state-owned Philippine Crop Insurance Corp. (PCIC) sa pamamagitan ng Notice of Cash Allocation (NCA).
Aniya pa, ang alokasyong P900 milyon para sa first quarter ng insurance premiums at bahagi ng P4.5 bilyong Special Allotment Release Order (SARO) para sa taong 2024 ay inilaan para sa suporta at operasyon ng PCIC.
“In light of the escalating challenges posed by climate change, which heightens the risks to both our economy and food security, it becomes imperative to prioritize the provision of financial security and insurance to empower our farmers and fishermen,” ayon sa Kalihim.
“This assistance is intended to help them safeguard their means of living, ensuring they can continue their activities despite unforeseen events,” dagdag na wika nito.
Matatandaang sinabi ni Pangulong Ferdinand Marcos Jr. na ang pagtutulungan ng lahat para mapaunlad ang sektor ng agrikultura ay isa lamang sa mga pangunahing hakbang tungo sa pagbuo ng isang Bagong Pilipinas kung saan walang nagugutom at ang lahat ay masigabong kumikilos para sa mas masaganang kinabukasan. Kris Jose
