MANILA, Philippines – Ipinanukala ni Presidential Adviser on Peace, Reconciliation, and Unity Secretary Carlito Galvez Jr. ang paglikha ng Department of Peace para maisulong ang peace agenda ng pamahalaan.
Sa Kapihan sa Manila Bay forum, sinabi ni Galvez na layong palitan ng panukalang Peace Department ang Office of the Presidential Adviser on Peace, Reconciliation and Unity (OPAPRU), at mapanatili ang mga tagumpay para sa komprehensibong peace process sa mga darating na taon.
“Nakita namin kasi na best practices ng other countries, meron talagang institution… Meron talagang Ministry or Department of Peace,” ani Galvez nitong Miyerkules, Hulyo 3.
Sa paglikha ng Department of Peace, umaasa si Galvez na ang lahat ng peace initiatives sa nagdaan at kasalukuyang administrasyon “will be consolidated, integrated, and institutionalized, which the succeeding administrations can build upon.”
Sinabi rin ng opisyal na sa ilalim ng kasalukuyang setup ng OPAPRU, karamihan sa management at personnel ay mayroong contractual positions at walang security of tenure.
Magbibigay daan ang paglikha ng isang bagong kagawaran para matugunan ang security tenure at career advancement ng kanilang mga empleyado.
Dagdag pa ni Galvez na sisiguruhin ito na magkakaroon ng ‘entity’ na “with a more permanent character” sa national government.
Mag-aambag ng malaki ang Department of Peace sa promotion ng kapayapaan “that is not merely a fleeting priority or an ad hoc approach, but rather a sustained and consistent effort of the government.” RNT/JGC
