MANILA, Philippines- Sinubukan ng 1st Tank Battalion ng Philippine Army (PA) ang 105mm main guns ng bagong bili nitong light tanks mula sa Israel.
Sa isang Facebook post nitong Miyerkules ng gabi, sinabi ng 1st Tank Battalion na isinagawa ang test fire sa familiarization at training exercise para sa Army personnel sa paggamit ng Elbit Systems’ Land Sabrah light tanks sa Col. Ernesto Rabina Air Base target range sa Tarlac noong Hulyo 8-11.
“This event was a crucial part of maintaining the battalion’s combat readiness and operational efficiency, providing both seasoned soldiers and new trainees with invaluable hands-on experience,” pahayag ng 1st Tank Battalion.
Dagdag nito, kabilang sa training sessions ang serye ng realistic combat scenarios na idinesenyo upang suriin at paghusayin ang “accuracy, reliability, and firepower” ng Sabrah tanks.
Anang 1st Tank Battalion, malaki ang maiaambag ng light tanks sa territorial defense capabilities ng PA.
Dumalo rin si Armor Division commander Maj. Gen. Pedro C. Balisi Jr. sa pagsasanay upang suriin ang performance ng Sabrah light tanks.
Inaasahang matatanggap ng Armor Division ang 20 units ng Sabrah mula 2023 hanggang 2024 bukod sa 10 units ng wheeled armored vehicles.
Ang light tank acquisition project ay sa ilalim ng Horizon 2 ng Revised Armed Forces of the Philippines Modernization Program.
Nagkakahalaga ang kontrata ng P9.4 bilyon at ikinasa sa pamamagitan ng government-to-government mode. RNT/SA
