MANILA, Philippines – Sinabi ni Philippine Amusement and Gaming Corporation (PAGCOR) Chairman Alejandro Tengco na maliwanag ang utos ng Pangulong Marcos na ipagbawal ang lahat ng Philippine offshore gaming operators (POGOs).
Ayon kay Tengco, ang direktiba ng Pangulo ay sumasaklaw sa mga natitirang legal na POGO sa bansa—na ngayon ay may label na Internet Gaming Licensees. (IGLs).
“Hindi ko po mawi-wind down ‘yung mga ilegal dahil wala na po sa jurisdiction ko ‘yun. Pero ‘yung mga nasa jurisdiction kong 43 (IGLs), maliwanag po ‘yun na kailangan ko pong i-wind down na po ‘yun,” sabi ni Tengco.
Inilabas ng PAGCOR chief ang paglilinaw na ito sa joint hearing ng House Committees on Public Order and Safety and on Games and Amusement noong Martes, Hulyo 23.
Hiniling ni ACT Teachers Party-list Rep. France Castro ang paliwanag ni Tengco sa POGO ban dahil nagpahayag siya ng pagkabahala na ang kalabuan sa direktiba ni Marcos ay maaaring humantong sa ilang butas sa pagpapatupad nito.
“Kailangan ma-distinguish natin at ma-clarify ‘yung sinasabi ni Presidente na POGO kasi baka hindi rin naabot sa kaalaman niya na pinalitan na natin ito ng IGL,” sabi ni Castro.
Tulad ng idinetalye ni Tengco sa mga miyembro ng joint panel, ang pangunahing pagkakaiba sa pagitan ng mga POGO at IGL ay semantics lamang.
Matapos siyang maupo noong nakaraang taon, sinabi ng Pagcor chief na pinangunahan niya ang pagpapatupad ng mas mahigpit na regulasyon sa mga POGO, na kinabibilangan ng pagpapalit ng pangalan sa mga IGL.
“Pinalitan namin yung struktura, pinalitan po namin ‘yung mga guidelines, pinalitan na rin namin yung pangalan kasi may stigma po,” saad ni Tengco.
Ang mga kamakailang pagsalakay sa POGO hub ay nagpapakita na mayroong tahasang koneksyon sa pagitan ng mga kumpanya ng pagsusugal sa mga ilegal na aktibidad tulad ng prostitusyon, tortyur, at pagpatay.
Ipinunto ni Castro na ang terminong IGL ay ginawa ng PAGCOR sa hangarin na mapabuti ang katakut-takot na imahe ng mga POGO, “ngunit pareho sila”.
Sinabi ni Tengco na mayroong malaking pagakakaiba sa pagitan ng dalawa dahil sa updated guidelines at structure sa ilalim ng kanyang leadership.
Ngunit matapos idiin ng Makabayan bloc lawmaker, inamin ni Tengco na pareho ang POGO at IGL.
“Kaya ‘pag nagrekomenda kayo kay Presidente pakilinaw natin. Baka ‘yung sinasabi niyo kasi na POGO iba-ban pero dahil binago niyo nga ‘yung guidelines ‘yung IGL will remain,” binigyan-diin ni Castro. (Jocelyn Tabangcura-Domenden)
