MANILA, Philippines – Asahan ang mas murang pamasahe sa eroplano pagsapit ng Setyembre dahil sa nakaambang downgrade ng Civil Aeronautics Board (CAB) sa fuel surcharge level para sa domestic at international flights.
Sa abiso, sinabi ng CAB na ang passenger at cargo fuel surcharge para sa domestic at international flights ay itinakda sa Level 5 para sa Setyembre 1 hanggang 30, 2024 period, mula sa kasalukuyang Level 6.
Ang fuel surcharge ay isang bayarin na iba sa base fare, na maaaring ipasa ng mga airlines sa mga pasahero upang mabawi ang halaga ng gastusin sa mabilis na paggalaw ng presyo ng jet fuel.
Sa ilalim ng Level 5, ang fuel surcharge para sa domestic passenger flights ay mula P151 hanggang P542 depende sa layo, habang sa international passenger flights na mula Pilipinas, ang fuel surcharge ay mula P498.03 hanggang P3,703.11.
Sa kasalukuyang Level 6, ang pasahero ay nagbabayad ng P185 hanggang P665 sa fuel surcharges para sa domestic flights, depende sa flight distance habang mula P610.37 hanggang P4,538.40 para naman sa international flights.
“Airlines wishing to impose or collect fuel surcharges for the same period must file its application with this Office on or before the effectivity period, with fuel surcharge rates not exceeding the above-stated level,” sinabi ng CAB. RNT/JGC
