MANILA, Philippines- Kailangan munang dumaan ng International Criminal Police Organization (Interpol) sa Philippine court system sakaling mag-isyu ang International Criminal Court (ICC) ng warrant of arrest sa mga indibidwal sa bansa, ayon kay Justice Secretary Jesus Crispin “Boying” Remulla nitong Miyerkules.
Inihayag ito ni Remulla sa Senate finance committee hearing sa panukalang P40.585 bilyong budget ng Department of Justice (DOJ) at attached agencies nito.
“When it comes to them (Interpol) going into the country, kung gusto nilang pumasok dito upang manghuhuli at gusto magsagawa ng warrant na na-isyu ho ng ICC pagdating ng panahon, kailangan po itong dumaan sa ating court system,” pahayag ni Remulla.
“Ito po ay kinakailangan ng isang aksyon, action to enforce a warrant, action to enforce a judgment. Kailangan pong dumaan ‘yan sa ating court system,” dagdag niya.
Sakaling magtungo ang Interpol sa Philippine courts, sinabi ng Justice Secretary na hindi makikialam ang DOJ sa proseso.
“So hindi ho namin pakikialaman kasi ‘yan po trabaho na ng Interpol kung talagang gusto nilang habulin ‘yung taong nasasakdal. Sabihin natin nag-isyu po ng warrant of arrest ang ICC, gusto i-enforce ng Interpol dito, para ho ito ay matuloy at hindi magkaroon ng kasuhan, kinakailangan po magpunta sila sa korte natin. ‘Yun po ang aming paningin,” paliwanag niya.
Matatandaang inihayag ni Remulla na ang Philippine officials “respect the actions of Interpol 99% of the time” at sila ay hindi “in the business of blocking any movement of the Interpol unless a policy is laid out.” RNT/SA
