ISA pang kasong plunder ang isinampa laban kay San Pedro City Mayor Art Francis Joseph Mercado ng Lalawigan ng Laguna at sa kanyang konseho sa Office of the Ombudsman dahil sa umano’y paggawa ng panibagong paglabag sa plunder law — ngunit sa pagkakataong ito ay isinampa ito ng isang pribadong mamamayan noong Martes.
Nagtungo sa Ombudsman ang dating empleyado ng San Pedro City-hall Public Order and Safety Office na si Jason Vierneza para magsampa ng paglabag sa Republic Act (R.A.) 7080 o ang plunder law, R.A. 3019 o ang anti-graft and corrupt practices act gayundin para sa gross inexcusable negligence at grave misconduct.
Si Vierneza, na nagbitiw noong Hulyo pagkatapos ng halos 19 na taon sa serbisyo, ay nagpahayag ng pagkadismaya kay Mercado at sa kanyang konseho ng lungsod para sa kanyang pagbili ng isang 22,500 square-meter property land na matatagpuan sa barangay Landayan sa San Pedro nang walang partikular na plano at tamang legal na paglilitis.
Ayon sa 14-page complaint plus annexes of evidence na isinumite ni Vierneza, ang halaga ng parcel land na binili ay P135,000,000 o P6,000 per square-meter noong Abril 20, 2023, batay sa disbursement voucher ng San Pedro City-hall .
“Nadismaya kami sa aming mayor at sa kanyang konseho. Nagsampa ako ng kasong plunder laban sa kanila sa Ombudsman dahil sa pagbili ng lupa sa sarili kong bayan sa barangay Landayan. Nagdulot ito sa amin ng matinding pagbaha na nakaapekto sa ilang residential areas dahil sa patuloy na pagtatambak ng lupa,” ani Vierneza.
“Naninindigan ako para sa mga taga-Landayan sa usaping ito dahil apektado tayo. Nalaman din namin na hindi ito dumaan sa tamang legal na proseso base sa mga dokumentong nakuha namin,” dagdag pa nito. “Walang tiyak na plano na gagawin nila sa lupang binili nila.”
Iginiit din ni Vierneza na overpriced umano ang biniling land property — kumpara sa orihinal na 1,300 per square-meter para sa kabuuang P29,500,000 million-offer ni dating San Pedro City mayor Lourdes Cataquiz tatlong taon na ang nakararaan.
Bukod kay Mercado, sinampahan din ni Vierneza ng kasong plunder sina Vice Mayor Divina Olivarez, Councilors Michael Casacop, Sheriliz Almoro, Joie Chelsea Villegas, Leslie Lu, Atty. Mark Oliveros, Aldrin Mercado, Bernadette Olivarez, Jose Mendoza, at Vincent Solidum.
Kinaladkad din sa kaso sina San Pedro City ex-officio member of Sangunian Panglungsod President of Liga ng mga Barangay Diwa Tayao at Sangunian SK Federation President Raphael Ty, city administrator Atty. Henry Salazar, at 12 iba pang opisyal ng lungsod.
Si Attorney Melvin Matibag ay nagsilbing abogado ni Vierneza sa pagsasampa ng kasong plunder.
“Ang land banking ay hindi trabaho ng lokal na pamahalaan matapos bumili ang pamunuan ni Mayor Art [Mercado] ng isa pang land property nang walang layunin. Pangalawang beses nila itong ginawa pagkatapos nilang makuha ang lupain sa Laram para din sa future development o para magamit sa hinaharap,” ani Matibag.
“Hindi pwede. Sa ilalim ng batas, ipinagbabawal ang pagbili ng land property kung walang tiyak na gamit o plano para dito, kung maraming informal settlers, at kung ito ay flood prone area. Ito ay isang lugar na madaling bahain sa tabi ng Lawa ng Laguna.
“Nalulungkot ako sa nangyayari sa mga taga-Landayan at San Pedro dahil sa pagbaha.” Ito na ang ikalawang pagkakataon na sinampahan ng kasong plunder sina Mercado, Olivarez, at kanilang konseho matapos ihain ni City Councilor Carlon “Lonlon” Ambayec ang kasong iyon laban sa kanila dahil sa pagbili ng land property sa barangay Laram na nagkakahalaga ng P73,644,000 milyon nang walang tiyak na plano.
Idinagdag ni Matibag na walang partikular na plano para sa pagbili ng lupang iyon sa Laram — gayundin sa barangay Landayan — kung ginagamit nila ang lupa para sa pagtatayo ng pampublikong ospital, paaralan, opisina ng gobyerno at pabahay, bukod sa iba pang mga imprastraktura.
Walang appointment ng board of assessors na mag-a-assess sa nakuhang ari-arian at kahit na walang annual investment plan, ayon din kay Matibag. RNT
