MANILA, Philippines- Inanunsyo ng Commission on Elections (Comelec) nitong Biyernes na tinanggap nito ang pag-atras ng St. Timothy Construction Corporation (STCC), isa sa tatlong local firms sa South Korean Miru Systems-led joint venture para sa automated election system para sa darating na 2025 elections.
“As such, the remaining partners of the Joint Venture must submit its NFCC (Net Financial Contracting Capacity) at least equal to the Contract Price or a committed Line of Credit from a Universal or Commercial Bank at least 10% of the Contract Price within ten (10) days from the receipt of this Resolution,” pahayag ni Comelec chairperson George Erwin Garcia, batay sa nakasaad sa memorandum.
Ang STCC ang nagbigay ng Net Financial Contracting Capacity (NFCC) para sa P17.99 bilyong kontrata para sa bagong AES at automated counting machines para sa 2025 polls.
Sinabi ng Comelec na sa kabila ng pag-atras ng STCC, nananatili ang obligasyon ng mga natitirang partner sa ilalim ng Full Automation System with Transparency Audit/Count (FASTrAC) Contract.
Ang dalawa pang local firms ay ang Integrated Computer Systems at Centerpoint Solutions Technologies, Inc.
Sinabi ni Garcia na inatasan ng Comelec ang law department na tukuyin kung mayroong civil, criminal, o administrative liability sa bahagi ng STCC o sa joint venture sa kabuuan.
Nauna nang sinabi ni Garcia na umatras ang STCC mula sa joint venture matapos ihayag ng Comelec ang pagkabahala sa impormasyong ilan sa umano’y mga may-ari ng STCC ang nagsabing tatakbo sa local at national positions sa 2025 polls sa kabila ng posibleng conflict of interest. RNT/SA
