MANILA, Philippines – Walang ideya si Senador Ronald Dela Rosa, hepe ng Philippine National Police sa administrasyong Duterte, kaugnay ng reward system para sa mga pulis sa war on drugs na mula umano sa “Davao model.”
Ibinunyag kasi ni dating police colonel Royina Garma sa Kamara nitong Biyernes, Oktubre 11 na tinawagan siya ni dating Pangulong Rodrigo Duterte noong Mayo 2016 para humingi ng tulong sa pagrekomenda sa isang opisyal na maaaring magpatupad ng modelong ginagamit sa Davao City at gamitin sa buong bansa.
Kasama umano rito ang reward system o pabuya sa bawat mapapatay na drug personalities.
“I have no idea about that reward system,” pagbabahagi ni Dela Rosa sa panayam ng ABSCBN News nitong Sabado, Oktubre 12.
“During my time as the Chief, PNP, I did not engage in a reward system because I had no funds for that,” dagdag pa niya Dela Rosa.
Bukod dito, hindi rin umano alam ni Dela Rosa ang motibo ng pag-testigo ni Garma sa Kamara.
Sa affidavit kasi ni Garma, sinabi nito na ang Davao Model ay mayroong tatlong uri ng payment o reward para sa mga pulis:
“First is the reward if the suspect is killed. Second is the funding of planned operations (COPLANS). Third is the refund of operational expenses.”
Sa pagtatanong naman ni Kabataan Partylist Rep. Raoul Manuel sa kung magkano ang pabuya, sinabi ni Garma na ito ay nasa pagitan ng P20,000 hanggang P1 milyon.
Samantala, sinabi ni Dela Rosa nitong Sabado na “the only reward system in the PNP is the [Department of the Interior and Local Governemnt]-approved list of most wanted persons.”
Dagdag pa niya, hindi siya naniniwala sa pagpapatupad ng reward system dahil, “it is a sworn duty of every policeman to keep his area of responsibility free from drugs.” RNT/JGC
