MANILA, Philippines – Dapat pa rin ibigay ang 20% discount sa person with disability (PWD) kahit ilan beses ito bumili ng mga pagkain basta para sa kanyang eksklusibong konsumo.
Batay sa apat na pahinang legal opinion ng Department of Justice (DOJ), ilalapat ang diskwento at pagbubukod sa value added tax (VAT) sa kabuuang halaga ng pagkain na binili.
“In other words, in purchase of a group meal which is ideally for food sharing, if it can be clearly determined that it was for the exclusive use, enjoyment, or availment of only one person who is a PWD… then the 20% discount and VAT exemption should apply to the total amount of food purchased,”nakasaad sa legal opinion.
Ayon sa DOJ, nakalagay sa Section 6 ng implementing rules and regulations ng “An Act Expanding the Benefits and Privileges of PWDs,” ang benepisyo sa pagbili ng kahit anong goods at serbisyo ay esklusibong para lamang sa PWD.
Mayroon din memorandum circular ang Department of Tourism na ang 20% discount at VAT exemption ay para lamang sa PWDs.
Inilabas ng DOJ ang naturang legal opinion dahil sa kahilingan ni National Council on Disability Affairs (NCDA) Executive Director Glenda Relova.
Humingi ang NCDA ng paglilinaw kung sakop ng naturang benepisyo ang lahat ng pagkain at inumin na binibili ng PWD kahit gaano pa ito karami. TERESA TAVARES
