MANILA, Philippines – Hindi maituturing na mga empleyado ng gobyerno sa ilalim ng hurisdiksyon ng Civil Service Commission (CSC) ang mga contract of service o job order worker na nagtrabaho para sa Philippine Amusement and Gaming Corporation (PAGCOR).
Sa desisyon ng Supreme Court First Division na isinulat ni Associate Justice Ramon Paul L. Hernando, hindi mga empleyado ng PAGCOR an grupo ng mga manggagawa na nagtrabaho bilang kusinero, waiter, dishwasher, at iba pa para sa hotel and restaurant business ng PAGCOR.
Ipinaliwanag ng Korte Suprema na walang employer-employee relationship sa pagitan ng gobyerno at mga job order worker na ang mga serbisyo ay hindi itinuturing na serbisyo ng gobyerno.
Batay ito sa klase ng kanilang mga tungkulin, organizational ranking, antas ng kompensasyon, at employment contract.
Dahil dito, hindi sila sakop ng batas, alituntunin, at regulasyon ng Civil Service.
Idinagdag pa ng Korte na ayon din sa CSC-COA-Department of Budget and Management Joint Circular No. 1, malinaw na nakasaad na ang mga contract of service o job order worker ay hindi sakop ng mga batas at alituntunin ng Civil Service. TERESA TAVARES
