Kuta ng mga NPA sa Mt. Province, nakubkob

MANILA, Philippines – Nakubkob na ng mga otoridad ang kuta ng mga makakaliwang grupo o New Peoples Army (NPA) sa Sitio Mapao, Barangay Gueday, Besao, Mountain Province.

Natagpuan ng mga operatiba ng 1st Mountain Province Provincial Mobile Force Company at Besao Municipal Police Station habang sila ay nagsasagawa ng Internal Security Operation ang abandonadong kampo sa magubat na bahagi ng nasabing lugar.

Narekober ang sampung piraso ng Ammonium Nitrate–Fuel Oil, anim na piraso ng improvised explosive device container, apat na piraso ng dynamite sticks, isang IED grenade, mga subersibong dokumento at mga personal na kagamitan.

Ipinasakamay naman ang IED material sa Provincial Explosive Ordnance Disposal and Canine Unit sa Mountain Province, habang nasa pangangalaga ng 1st Mountain Province Provincial Mobile Force Company ang ibang narekober na kagamitan.

Hanggang sa ngayon ay patuloy ang paggalugad ng mga operatiba sa nasabing lugar na pinaniwalaan pinaglipatan ng mga kumunistang NPA. Rey Velasco