MANILA, Philippines- Maaaring muling simulan ang civil works para sa Bicol River Basin Development Program (BRBDP), isang proyektong sinisilip na buhayin ng Marcos administration, 40 taon matapos itong matigil noong 1986, base sa Department of Public Works and Highways (DPWH) nitong Linggo.
Sa isang panayam, binanggit ni DPWH Secretary Manuel Bonoan ang paghahanda para sa reevaluation ng BRBDP bilang isang flood control measure, sa tulong ng Korean Exim Bank.
“So ito ‘yung pine-prepare namin and we hope that we can prepare all the detailed engineering designs, ‘yung mga flood control projects by early next year,” pahayag ni Bonoan.
“But it will take a little time actually kasi marami ito at saka malalaking projects ito so there’s a chance that we may be able to do the civil work, ‘yung mga projects na by 2026 thereafter,” dagdag niya.
Inilunsad noong 1970s sa ilalim ng administrasyon ni dating Pangulong Ferdinand Marcos Sr., ang BRBDP ay isang geography-based development initiative para sa Bicol Region. Subalit, itinigil ito noong 1986 nang pumasok ang administrasyon ni Corazon Aquino.
Nitong Sabado, inilahad ni Pangulong Ferdinand “Bongbong” Marcos Jr. na plano niyang muling busisiin ang BRBDP, proyekto ng kanyang ama, kasunod ng epekto ni Severe Tropical Storm Kristine sa Bicol Region.
Sinabi ng Pangulo, bumisita sa Camarines Sur para sa situation briefing, na “doble” ang ulan sa Bicol Region sa gitna ni Kristine kumpara noong kay Ondoy noong 2009.
“That’s the proverbial problem of the Bicol River Basin. Kaya kailangan talaga nating pag-isipan what are we going to do in the long-term, because we cannot expect any changes. Next time it rains, ito na naman tayo. It will be the same situation all over again. So we have to find a long-term solution,” anang Pangulo. RNT/SA
