MANILA, Philippines- Nag-deploy ng 91 health workers sa Bicol Region ang Department of Health (DOH) kasunod ng pananalasa ng bagyong Kristine.
Sinabi ng DOH nitong Linggo na 39 doktor, nurse, at katuwang na health professionals ang darating sa Naga City General Hospital (NCGH) sa pamamagitan ng airlift.
Samantala, 52 iba pang health workers ang idineploy sa Bicol Region General Hospital ay Geriatic Medical Center sa Cabusao, Camarines Sur.
Sinabi rin ng DOH na sasama sa convoy ng mga pampasaherong bus ang mga ambulansya nito na may mga karaniwang kagamitan, gamot, at suplay na ibinibigay ng Department of Public Works and Highways.
Ang mga health worker na ito ay mula sa kinikilala ng WHO na Philippine Emergency Medical Assistance Teams mula sa Jose B. Lingad Memorial General Hospital sa Pampanga; ang Dr. Jose N. Rodriguez Memorial Hospital at Sanitarium sa Maynila; at ang Eastern Visayas Medical Center sa Tacloban City.
Nakiisa rin sa deployment ang mga health staff mula sa East Avenue Medical Center, Amang Rodriguez Memorial Medical Center, San Lorenzo Ruiz General Hospital, Tondo Medical Center, at Valenzuela Medical Center.
“We are serious when we say, ‘bawat buhay mahalaga’—wala talagang maiiwan,” sinabi ni Health Secretary Teodoro Herbosa said.
Inatasan ni Pangulong Ferdinand “Bongbong” Marcos Jr. ang Department of the Interior and Local Government na magtayo ng mga emergency field hospital at magdala ng mga gamot sa mga apektadong lugar sa Bicol Region. Jocelyn Tabangcura-Domenden
