MANILA, Philippines – Hinamon ni Lanao del Sur Rep Zia Alonto Adiong si dating Pangulong Rodrigo Duterte na tuparin ang ipinangakong pagharap sa House Quad Committee gaya ng ginawang pagdalo nito sa pagdinig ng Senate Blue Ribbon Committee.
“Elected leaders should have the courage to practice the virtue of having a word of honor,” pahayag ni House Assistant Majority Leader Zia Alonto Adiong ng Lanao del Sur.
Ipinunto ni Adiong na mahalaga ang presensya ni Duterte sa imbestigasyon ng QuadComm.
“It would demonstrate that he’s not afraid of accountability, just as he showed in the Senate probe, where he took responsibility and advocated for the victims of extrajudicial killings during his administration, shielding his police officers from potential criminal or administrative charges,” paliwanag ni Adiong.
Sa isang sulat, sinabi ng abogado ni Duterte na si Martin Delgra na dadalo ang dating Pangulo sa pagdinig ng komite.
Kinumpirma ni Delgra, na nagsilbing chairman ng Land Transportation Franchising and Regulatory Board (LTFRB) sa ilalim ng administrasyong Duterte, sa sulat nito kay QuadComm Overall Chairman Surigao del Norte Rep. Robert Ace Barbers na dadalo ang kanyang kliyente sa pagdinig matapos ang paggunita ng Undas.
Ang susunud na pagdinig ng komite ay sa Huwebes, Nobyembre 7. Gail Mendoza
