MANILA, Philippines – Hindi makaaapekto ang courtesy resignation ni Department of National Defense (DND) Secretary Gilberto Teodoro Jr. sa operasyon ng Armed Forces of the Philippines (AFP).
Ayon kay Rear Adm. Roy Vincent Trinidad, spokesperson ng Philippine Navy para sa West Philippine Sea (WPS), ang AFP ay isang propesyonal na organisasyon na patuloy na tutuparin ang mandato nito na magsilbi sa mga Pilipino at protektahan ang bansa.
Ang courtesy resignation ni Teodoro ay tugon sa kautusan ni Pangulong Ferdinand Marcos Jr. kaugnay sa muling pagbuo ng Gabinete.
“The AFP is a professional organization. We keep performing our mandate just as other agencies of the government are professional in performing their mandates. Tayo naman kung sino man ang nakaupo sa atin, we keep performing our mandate. Kung sinong maitalaga sa gobyerno, we are full support from the Navy, the Air Force, and the Army,” ani Rear Adm. Trinidad.
Binanggit ni Trinidad na “doing good” ang AFP sa ilalim ng pamumuno ni Teodoro sa nakalipas na tatlong taon, lalo na sa mga operasyon sa West Philippine Sea.
“Nakikita ito sa resulta ng mga surveys na naiintindihan ng ating taumbayan at sumusuporta sila sa paninindigan ng DND at AFP in performing its mandate, especially sa West Philippine Sea,” dagdag niya.
Binigyang-diin ni Trinidad na buo ang suporta ng Navy kay Teodoro at walang sagabal sa kanilang mga operasyon, kahit na hindi pa malinaw ang desisyon ng Pangulo tungkol sa courtesy resignation ni Teodoro.
“There are no roadblocks, the SND [Secretary of National Defense] has our full support. Whatever the guidance of the SND is as the alter ego of the President in the Defense Department, we fully support it. We have a very robust relationship with our SND,” ani Trinidad.
Matatandaang, noong nakaraang linggo, inatasan ni Pangulong Marcos ang kanyang mga Cabinet secretaries na magsumite ng courtesy resignation bilang bahagi ng pagbabago matapos ang hindi kanais-nais na resulta ng midterm elections.
Habang pinanatili ng Pangulo sa puwesto ang kanyang economic team at Executive Secretary Lucas Bersamin, tinanggap niya ang mga resignation nina Ambassador Antonio Lagdameo, Permanent Representative to the United Nations, at Environment Secretary Maria Antonia Yulo Loyzaga. Nagdesisyon din ang Pangulo na palitan ang pinuno ng Department of Human Settlements and Urban Development (DHSUD).
Sa ngayon, hindi pa nagdedesisyon si Pangulong Marcos sa courtesy resignation ni Teodoro bilang Kalihim ng DND. Kris Jose
