MANILA, Philippines- Nasamsam ng mga operatiba ng Criminal Investigation and Detection Group (CIDG) ang halos P2 milyong halaga ng tobacco products kasunod ng pagkakaaresto sa isang Chinese businessman sa isang operasyon sa Malabon.
Sinabi ni CIDG director Maj. Gen. Nicolas Torre III na bahagi ng operasyon ng pagsisikap na tugisin ang mga sangkot sa pagmamanaupaktura at pagbebenta ng counterfeited items at illicit trading ng tobacco products sa buong bansa.
Matapos makumpirma ang intelligence reports ukol sa pagkakasangkot ng isang Ziqiang sa pagbebenta ng pekeng sigarilyo, nagsagawa ang CIDG operatives ng operasyong nagresulta sa pagkakadakip sa suspek sa Orange Road sa Potrero noong May 23.
Nasabat ang tatlong master cases ng umano’y peke at /’trademark infringing” Marlboro Gold Nise at Luxury cigarettes na nagkakahalaga ng halos P2 milyon.
“This underscores our unrelenting fight against counterfeited products and violations of Intellectual Property Code,” giit ni Torre.
Kinasuhan na ang suspek ng paglabag sa Section 155 (Trademark Infringement); Section 168 (Unfair Trade Competition); in relation to Section 170 of Republic Act No. 8293 (Intellectual Property Code of the Philippines). RNT/SA
