MANILA, Philippines- Naghain ng petition for habeas corpus ang kampo ni dating Negros Oriental Representative Arnolfo “Arnie” Teves Jr. matapos maaresto sa Timor-Leste.
Sinabi ni Atty. Ferdinand Topacio, legal counsel ni Teves, inaresto ang kanyang kliyente ng immigration police nang walang warrant.
Kasalukuyang nakakulong si Teves sa Ministry of Interior.
Kung kakatigan ng korte ang writ of habeas corpus, kailangang iharap si Teves sa korte at dapat bigyang-katwiran ng mga awtoridad kung bakit ito inaresto.
“Kailangang makumbinsi ng mga authorities na umaresto kay Ginoong Teves kung bakit siya inaresto… at kung siya ay ide-deport, what will be the basis for his deportation,” ani Topacio.
Sa Facebook post, sinabi ng anak ni Teves na si Axl na walang iprinisintang warrant o anumang dokumento ang mga umaresto sa kanyang ama.
Si Teves ang sinasabing mastermind sa pagpatay kay Negros Oriental governor Roel Degamo at siyam na iba pa noong March 4, 2023.
Samantala, iginiit ni Topacio na Marso pa ibinasura ng Court of Appeals ng Timor-Leste ang extradition request ng Pilipinas.
Sinabi ng CA Timor-Leste na hindi maaaring ibalik sa Pilipinas si Teves dahil sa panganib umano na kinakaharap nito, sa posibilidad na isailalim sa torture at iba pang uri ng parusa at maaari umanong isailalim si Teves sa pagdinig na magdudulot sa kanya ng kawalan ng hustisya. Teresa Tavares
