MANILA, Philippines- Nadakip ng anti-drug operatives ang isang high-value individual (HVI) at nasabat ang halos P13.6 milyong halaga ng shabu sa Quezon City, base sa National Capital Region Police Office (NCRPO) nitong Miyerkules.
Sinabi ni NCRPO Director Maj. Gen. Anthony Aberin na nahuli ang suspek na si alyas Jessie, 43, sa isang buy-bust operation sa kahabaan ng San Mateo Road, corner Filinvest 2 Road, sa Barangay Batasan Hills dakong alas-9:35 ng hapon ng Martes.
Nasabat mula sa suspek ang dalawang kilo ng hinihinalang shabu na nakapaloob sa Chinese tea bags.
Nasamsam din ng mga operatiba ang bank transaction slips, personal IDs, at isang mobile phone, na maaaring magamit sa imbestigasyon.
Nagsagawa ng operasyon ang mga operatiba ng Station Drug Enforcement Unit (SDEU), sa pakikipagtulungan sa Philippine Drug Enforcement Agency (PDEA) – NCR, kasunod ng intelligence reports mula sa Regional Counter-Intelligence.
“This major arrest was not instant. This was preceded by a series of intel-driven operations targeting small-time drug personalities who shared valuable intelligence resulting from the identification and arrest of this high-value individual,” wika ni Aberin.
Mahaharap ang suspek na nakapiit sa Batasan Police Station sa kasong paglabag sa Comprehensive Dangerous Drugs Act at ipiprisinta sa inquest proceedings sa Department of Justice National Prosecution Service. RNT/SA
