8 salary hike petitions inihain sa NCR wage board

MANILA, Philippines- Walong wage adjustment petition na nagtutulak ng P555 na dagdag sa sahod ang inihain sa Regional Tripartite Wages and Productivity Board (RTWPB) sa National Capital Region (NCR).

Sa abiso ng NCR wage board  inihain ang mga petisyon noong Mayo 22 ng mga sumusunod na grupo:

• Vanson Paper Industrial Workers Union,

• Samahang Manggagawa sa Philippine Span Asia Carrier Corp.,

• Samahang Manggagawa ng Jardine Schindler Elevator Corp.,

• Himlayang Pilipino Inc Labor Union,

• Kaisahang Manggagawa ng Himmel,

• Pambato Cargo Forwarder Labor Union,

• Nagkakaisang Samahan ng mga Manggagawa ng Regan, at

• Universal Robina Corporation Employees Union-Farm Division

Sinabi ng NCR wage board na ang petisyon ay tatalakayin sa itinakdang public hearing sa Hunyo 17 sa Occupational Safety and Health Center sa Quezon City.

“Parties, who intend to participate to the aforementioned hearing, may coordinate with RTWPB-NCR and may also submit position papers from May 29, 2025 to June 13, 2025,” anito.

“Any party may file an opposition (to the wage petition), copy furnished the petitioners on or before June 13, 2025,” saad pa sa abiso.

Nauna nang sinabi ng RTWPB-NCR na nagsimula ito sa pagrepaso sa minimum wage rate sa Metro Manila sa oras ng anibersaryo ng nakaraang salary adjustment sa rehiyon.

Huling naglabas ang wage board ang NCR ng salary adjustment para sa mga minimum wage earners noong Hunyo 27, 2024 na nagkakahalaga ng P35. Nagkabisa ang pagsasaayos noong Hulyo 17, 2024.

Ang kasalukuyang daily minimum wage sa NCR ay P645 para sa mga non-agricultural na manggagawa at P608 para sa mga nasa agrikultura, maliliit na retail at service establishments na may 15 o mas kaunting empleyado, at mga manufacturing firm na may mas kaunti sa 10 manggagawa. Jocelyn Tabangcura-Domenden