Ika-9 taong pagkakapanalo sa Hague ruling sa SCS dispute, ipinagdiwang ng DND

MANILA, Philippines – Bilang paggunita sa ika-9 na anibersaryo ng tagumpay ng Pilipinas sa Hague arbitral ruling noong 2016, muling iginiit ng Department of National Defense (DND) ang kahalagahan ng rule of law.

Ayon sa DND, para sa bansang tulad ng Pilipinas na isang arkipelago, ang paggalang sa batas pang-internasyonal ay hindi lamang prinsipyo kundi isang lifeline.

Idineklara ng Hague-based tribunal na walang bisa ang “nine-dash line” ng China sa West Philippine Sea.

“Ang pagtatanggol sa ating soberanya ay hindi provocation kundi isang banal na tungkulin sa sambayanang Pilipino,” ayon sa DND.

Iginiit ni National Security Adviser Eduardo Año na final at binding ang desisyon, batay sa UNCLOS, at nagsilbing batayan ng ilang batas tulad ng Philippine Maritime Zones Act at mga national security strategies.

Sa kabila nito, patuloy ang agresyon ng China: 49 Chinese vessels ang namataan sa WPS nitong Hunyo—pinakamataas ngayong taon. Kamakailan, sinanction ng China si dating Senador Francis Tolentino, na tinutulan naman ng DFA.

Nanawagan si Año ng mas maigting na pagtutol sa mga ilegal at mapanlinlang na aksyon ng China.

“Hindi tayo susuko,” aniya.

Patuloy umano ang Pilipinas sa pagtatanggol sa karapatan nito sa dagat sa pamamagitan ng maritime presence, pagpapatupad ng batas, at pakikipag-ugnayan sa mga kaalyadong bansa. RNT