TAGUIG, Philippines – Arestado sa ikinasang buy-bust operation ng mga operatiba ng District Drug Enforcement Unit ng Southern Police District (DDEU-SPD) ang limang high-value individuals (HVIs) na nakumpiskahan ng 500 gramo ng shabu na nagkakahalaga ng P3,400,000 Huwebes ng gabi, Hulyo 10.
Sa report na natanggap ni SPD director P/Brig. Gen. Randy Arceo ay nakilala ang nadakip na suspek na target ng operasyon na si alyas Jam, tinaguriang HVI-pusher at kilalang tulak sa Southern Metro Manila, at ang apat pang bagong kinilalang HVIs na sina alyas George, alyas Bailyn, alyas Noorulhoda, at isang alyas Monera.
Ayon sa SPD director, naganap ang pag-aresto sa mga suspek ng mga tauhan ng DDEU sa pakikipagtulungan ng District Intelligence Division (DID-SPD) at Sub-Station 5 ng Taguig City police dakong alas 8:57 ng gabi sa Colorado Street, Barangay Napindan, Taguig City.
Sa isinagawang operasyon ay nakumpiska sa posesyon ni alyas Jam ang 100 gramo ng pinaghihinalaang shabu, marked buy-bust money, brown envelope, at kulay asul na realme android phone.
Narekober din kina alyas George, alyas Bailyn, at alyas Monera ang tig-50 gramo ng shabu habang si alyas Noorulhoda naman ang may pinakamaraming droga na nakumpiska na mayroong 250 gramo na nakalagay sa isang kulay brown na Lim & Co. shoulder bag kung saan ang narekober na shabu sa mga suspek ay umabot sa 500 gramo.
Ang mga nakumpiskang ilegal na droga na gagamiting ebidensya sa korte laban sa mga suspek ay dinala sa SPD Forensic Unit para sumailalim sa chemical analysis.
Kasalukuyang nakapiiit sa custodial facility ng DDEU ang mga suspek na nahaharap sa kasong paglabag sa R.A. 9165 (Comprehensive Dangerous Drugs Act of 2002) sa Taguig City Prosecutor’s Office.
“This operation is a strong statement of our commitment to the marching orders of our Chief PNP, Police General Nicolas D. Torre III, to cleanse our communities of illegal drugs and dismantle the operations of high-value targets. The coordinated efforts of our operatives from SPD, Taguig CPS, and our intelligence units exemplify what it means to be ABLE, ACTIVE, and ALLIED. I commend the team for their precision, persistence, and professionalism. We will continue to intensify our fight because in Southern Metro, there is no place for drugs, no shield for traffickers, and no compromise on public safety,” ani Arceo. (James I. Catapusan)
