MANILA, Philippines – Tiniyak ng Department of Social Welfare and Development (DSWD) na nagpadala na ito ng kabuuang 2,086,314 family food packs (FFPs) bilang bahagi ng patuloy na disaster relief efforts para sa mga pamilya at indibidwal na apektado ng habagat at Tropical Cyclones Crising, Dante, at Emong na tumama sa bansa noong Hulyo.
“Alinsunod sa utos ng ating Pangulo, patuloy ang ating disaster operations para sa nasalanta ng nakaraang magkakasunod na kalamidad dulot ng habagat at Tropical Cyclones Crising, Dante at Emong. Mahigpit na bilin na huwag pababayaan ang mga kababayan natin na lubhang naapektuhan,” sinabi ni Asst. Secretary Irene Dumlao ng Disaster Response Management Group (DRMG) ng DSWD noong Lunes (Agosto 11).
Kaugnay nito batay sa pinakahuling ulat ng Disaster Response Operations Management, Information, and Communication (DROMIC), mahigit 2.8 milyong pamilya o 10.3 milyong indibidwal mula sa 9,809 barangay na matatagpuan sa 18 rehiyon, kabilang ang Bangsamoro Autonomous Region in Muslim Mindanao (BARMM), ang apektado ng sunud-sunod na weather systems.
“Through our Field Offices, patuloy ang disaster response efforts natin para siguradong ma-reach natin ang mga apektado at mangyari, dahil alam naman natin millions of families ang napinsala ng bagyo at ng habagat,” ayon pa kay Dumlao, na siya ring tagapagsalita ng DSWD.
As of press time, ang kabuuang humanitarian aid na ibinigay ng DSWD ay higit sa Php1.4 bilyon na kinabibilangan ng mga kahon ng FFP; ready-to-eat-food (RTEF); pamilya, kalinisan, kusina, sleeping kits; mga tolda ng pamilya, mga nakalamina na sako, mga modular na tolda; mga lalagyan ng tubig, at iba pang mga bagay na hindi pagkain kung kinakailangan. Kasama rin sa halaga ang tulong pinansyal na ibinigay sa 10,250 benepisyaryo sa ilalim ng Assistance to Individuals in Crisis Situation (AICS).
Ang mga aktibidad na psychosocial ay isinasagawa din ng mga social worker ng DSWD para sa mga kababaihan, mga bata, at iba pang mahihinang grupo. Sa ngayon, nakapagbigay na ng psychosocial first aid ang DSWD sa 1,546 na benepisyaryo.
“Kami ay patuloy na nakikipagtulungan sa mga local government units (LGUs), gayundin sa mga sektoral na grupo, upang matiyak na talagang naaabot natin ang lahat ng nangangailangan. Nagbigay ng tagubilin si Secretary Gatchalian na manatiling mapagbantay at mahusay sa ating mga aksyon sa pagtugon sa kalamidad lalo na’t tayo ay nasa kasagsagan ng panahon ng bagyo,” ipinunto pa ni Dumlao.
Kaugnay nito tiniyak ni Dumlao sa publiko na ang DSWD ay may sapat na supply ng food packs at patuloy na nagpupuno ng stockpile ng FFPs bilang paghahanda sa Severe Tropical Storm Gorio, ang pinakahuling weather disturbance na sinusubaybayan ng Philippine Atmospheric, Geophysical and Astronomical Services Administration (PAGASA). (Santi Celario)
