BULACAN, Philippines – Arestado ng imigrasyon ang anim na Chinese national sa Bulacan dahil sa paglabag sa mga kondisyon ng kanilang pananatili sa bansa.
Ayon sa Bureau of Immigration, kinukunsidera ang mga foreign national “undesirable aliens” dahil sa kanilang mga paglabag.
Ayon kay BI-Intelligence Division Chief Fortunato Manahan, Jr., nahuli ang anim noong Agosto 6 sa Brgy. Ang Sto. Cristo, San Jose Del Monte City, Bulacan matapos matagpuang nagtatrabaho sa isang construction company sa lugar.
Dalawa sa mga Chinese national ang may hawak na valid working visa, ngunit napetisyon ng isang kumpanya na iba sa aktwal na pinagtatrabahuhan nila — isang malinaw na paglabag sa mga tuntunin ng kanilang visa.
Ang apat pang iba ay may mga tourist visa lamang, na hindi nagbibigay sa kanila ng awtoridad na gumawa ng anumang uri ng trabaho sa Pilipinas.
“These individuals have committed serious violations of the conditions of their stay, which makes them undesirable aliens under our laws,” sabi ni Immigration Commissioner Joel Anthony Viado.
Ang anim ay sumasailalim ngayon sa deportation proceedings at isasama sa blacklist ng BI upang maiwasan ang muling pagpasok sa bansa. RNT/MND
