MANILA, Philippines – Inilunsad ng Office of Civil Defense (OCD) ang nationwide youth disaster preparedness brigade, na layong pormal na magturo sa mga kabataan bilang certified volunteers sa prevention, preparedness, at emergency response.
Pinirmahan ni OCD officer-in-charge Assistant Secretary Bernardo Rafaelito R. Alejandro IV ang memorandum of understanding nitong Biyernes, Agosto 15 kasama ang Sectoral Anti-Poverty (SAP) Leadership and Management Consultancy Services upang itatag ang Sagip-Buhay ng Mamamayan (SBM) Youth Brigade sa isang seremonya sa Camp Aguinaldo sa Quezon City.
“This memorandum of understanding marks the beginning of a shared mission to empower the youth in fortifying community resilience,” ani Alejandro.
Idinagdag pa niya na ang inisyatibo ay makatutulong sa mga lokal na pamahalaan at disaster offices upang palawakin ang kanilang kapasidad sa direktang pagsasali sa mga kabataang Pinoy.
Sa ilalim ng programa, pangungunahan ng OCD ang pagsasanay kasama ang Department of the Interior and Local Government, Sangguniang Kabataan, at local disaster risk reduction offices.
Ang SAP, sa pakikipagtulungan sa Philippine Red Cross and DAHON, Inc., ay magbibigay naman ng specialized instruction, pananatili sa nationwide database ng mga miyembro at pagsasaayos ng insurance coverage para sa brigade volunteers.
Magtuturo naman ang SBM Youth Brigade ng mga kasanayan kabilang ang hazard assessment, first aid, at community leadership.
Ang mga certified na miyembro ay kalaunang isasama sa local disaster risk reduction councils at formally accredited bilang community disaster volunteers.
Isasagawa ‘in phases’ ang rollout nito na sisimulan sa pilot program sa Metro Manila.
Sa pag-abot sa mga kabataan, umaasa ang OCD na makakalikha ng sustainable pool ng mga trained volunteer na susuporta sa disaster response offices.
Ang mga bagong brigade ay dagdag sa nagpapatuloy na hakbang ng pamahalaan at humanitarian partners upang palakasin ang kahandaan sa komunidad.
Iginiit din ng OCD na ang pagsangkot sa mga kabataan ay nagsisigurong ang kahandaan sa kalamidad ay nagiging “a shared responsibility across generations.” RNT/JGC
