MANILA, Philippines – Mahigit 8,000 trabaho sa 254 ahensya ng gobyerno ang bukas sa 2025 Government Job Fair mula Setyembre 2–5 sa 15 regional venues at Setyembre 9 sa Cordillera Administrative Region, ayon sa Civil Service Commission (CSC).
Bilang bahagi ng ika-125 anibersaryo ng Philippine Civil Service, tampok sa job fair ang plantilla at non-plantilla positions sa mga national agencies, LGUs, GOCCs, at state universities. Ayon kay CSC Chair Marilyn Yap, nalampasan ng 8,032 openings ang target na 6,300, na pinakamalaking bilang sa kasaysayan ng CSC job fairs.
Kabilang sa mga kalahok na ahensya ang DOJ, NBI, Pag-IBIG Fund, SSS, UP Diliman, BFP, DSWD, TESDA, DBM, NAPOLCOM, at ilang regional offices gaya ng Cotabato Regional Medical Center at pamahalaang panlalawigan ng South Cotabato.
Binigyang-diin ng CSC na bukas ang job fair para sa lahat—kabilang ang mga fresh graduates, career shifters, PWDs, indigenous peoples, at LGBTQIA+ community. Santi Celario
