MANILA, Philippines – Nagtalaga si Trade Secretary Cristina Roque ng acting heads ng Construction Industry Authority of the Philippines (CIAP) at Philippine Contractors Accreditation Board (PCAB), na naunang inilagay sa kanyang direct supervision kasunod ng mga kontrobersiya sa flood control projects.
Sa pahayag nitong Sabado, Setyembre 6, inanunsyo ni Roque na itinalaga niya sina Doris Gacho at Engr. Sergie Retome bilang acting executive directors ng CIAP at PCAB.
Sinabi pa ng Trade chief na ang pagkakatalaga nina Gacho at Retome ay “part of the ongoing efforts to clean up and revamp both agencies.”
Pansamantalang pangangasiwaan ng acting heads ang CIAP at PCAB hanggang sa may maitalagang permanent replacements batay sa Civil Service Commission (CSC) rules and procedures.
“This will ensure continuity of operations during the revamp,” ani Roque.
Nauna nang inanunsyo ni Roque na nagbitiw sa pwesto si PCAB executive director Herbert Matienzo dahil sa “personal reasons.”
Aniya, siya ay nasa proseso rin ng pagrekomenda ng mga bagong miyembro sa PCAB Board, kung saan pipili si Pangulong Ferdinand Marcos Jr. ng final board members.
Dagdag pa, inanunsyo rin ni Roque ang pagtatayo ng Oversight and Fact-Finding Management Team sa DTI.
Ang specialized team ay makikipag-ugnayan sa mga imbestigasyon, tugon, komunikasyon, at recovery efforts sa mga isyu katulad ng kasalukuyang PCAB licensing concerns, at sinabing “the initiative aims to uphold due process, transparency, accountability, and good governance.”
“This mechanism will safeguard public interest, ensure accountability, and maintain stakeholder confidence,” ani Roque. RNT/JGC
